नमस्कार. देववाणी ज्योतिषालयामध्ये तुमचं सर्वांचं स्वागत.
या मे महिन्याच्या ११ तारखेला मंगळ हा ग्रह मेष राशीमध्ये प्रवेश करत आहे. फलज्योतिषामध्ये मंगळाला विशेष महत्त्व दिले गेले आहे. या ग्रहाला ‘युद्धाची देवता’ असे म्हटलेले आहे. कारण मंगळाचे तत्त्वच मुळी महापराक्रमी, साहसी, चैतन्यशील आहे. त्याचबरोबर मनुष्याच्या अंगी असलेली जी काही ऊर्जा आहे, ती ऊर्जा म्हणजेच मंगळाची ताकद आहे.
समाजहिताच्या आणि विकासाच्या दृष्टीने मनुष्याच्या अंगी असलेले धाडस आणि न्यायप्रियता हे अतिशय महत्त्वाचे गुण आहेत. हे गुण फक्त आणि फक्त मंगळदेवामुळेच प्राप्त होतात. त्याचबरोबर धैर्यशक्ती, सहनशक्ती, शूरपणा, दुसऱ्यांचे दुःख निवारण करण्याची प्रवृत्ती आणि स्वार्थत्याग हा देखील त्याच्यामधील महत्त्वाचा गुण आहे.
सामाजिक पातळीवर जिथे गरज आहे, तिथे पुढाकार घेणे, नेतृत्व करणे, न्यायासाठी झटणे, दुसऱ्यांना मदत करणे आणि पूर्ण ताकदीने दुसऱ्यांसाठी लढणे हे मुख्य गुण या मंगळदेवाचे आहेत.
त्याचबरोबर अतिशय जलद आणि तीव्र परिणाम घडवून आणणाऱ्या गोष्टी, म्हणजे रसायनशास्त्रातील कामे, रक्तामधील दोष पुढे आणणे, ऑपरेशन, अपघात आणि जगातील युद्धे सुद्धा या मंगळावर अवलंबून आहेत. वास्तविक निसर्गतः हा पापग्रह असला, तरीसुद्धा सर्व प्राणीमात्रांचा हा एक संरक्षणमंत्री म्हणायला हरकत नाही.
आता आपण हाच मंगळदेव मेष राशीमध्ये प्रवेश केल्यामुळे काय काय घडवून आणणार आहे, याचा विचार करूया.
सध्या मेष राशीला शनीची साडेसाती आहे. मंगळदेव हाच मुळात अग्नितत्त्वाचा आहे आणि मेष रास ही देखील अग्नितत्त्वाची आहे. त्यामुळे स्वतःच्या राशीत आलेला हा मंगळदेव म्हणजे पूर्ण ताकदीने, साहसाने, आत्मविश्वासाने आणि धाडसाने सर्व गोष्टी घडवून आणणारा ठरेल.
२३ फेब्रुवारी ते २ एप्रिलपर्यंत राहू-मंगळाचा कुंभ राशीतील कालावधी हा अंगारक योग होता. त्यानंतर २ एप्रिल ते ११ मेपर्यंत मीन राशीमध्ये शनी आणि मंगळ हे द्वादशभावामध्ये, म्हणजेच व्ययस्थानामध्ये एकमेकांच्या बंधन योगात होते. याच बंधनातून मंगळ शनी महाराजांच्या तावडीतून सुटून मेष राशीमध्ये प्रवेश करणार आहेत. पण शनी महाराज मात्र ३ जून २०२७ पर्यंत मीन राशीतच राहणार आहेत.
स्वराशीत मेष राशीमध्ये असलेला आणि मेष व वृश्चिक राशीचा स्वामी असलेला हा मंगळदेव मेषेमध्ये आल्यामुळे कालपुरुषाच्या लग्नस्थानी आहे. त्यामुळे त्याची चौथी दृष्टी सुखस्थानावर, सातवी दृष्टी सप्तमस्थानावर आणि आठवी दृष्टी अष्टमस्थानावर पडत आहे.
चौथ्या आणि आठव्या स्थानावर असलेली दृष्टी ही विशेष दृष्टी मानली जाते. मंगळ हा दशम स्थान व दक्षिण दिशेलाही बलवान असतो. दशम स्थान हे कर्मस्थान असल्याने व्यक्तीला धडाक्याने कर्म करायला भाग पाडते. त्याच प्रमाणे तो जन्मकुंडलीत ३/१०/११ व्या स्थानात बलवान असतो. मंगळाची स्वतःची पूर्ण शक्तीनिशी ताकद दाखवणारी राशी मेष आणि वृश्चिक आहे. तर मकर ही उच्च रास असून कर्क ही नीच रास आहे.
चतुर्थस्थान म्हणजे कर्क रास, सप्तमस्थान म्हणजे तुळ रास आणि अष्टमस्थान म्हणजे वृश्चिक रास. म्हणून कर्क, तुळ आणि वृश्चिक या तीन राशींना मंगळ आपले गुणधर्म पुरेपूर देणार आहे.
आता मंगळदेवामुळे आपल्याला कोणकोणते गुणधर्म मिळणार आहेत आणि त्याचा आपण कसा उपयोग करावयाचा आहे, याचा विचार करूया.
मंगळाची प्रभावी क्षेत्रे पोलिस, लष्कर असून लढणाऱ्या सैनिकांवर त्यांचे वर्चस्व असते. मंगळ रक्ताचा कारक असल्याने पशू हत्या करणारा खाटीक आणि शस्त्रक्रिया करणारे डॉक्टर हेही मंगळाच्या प्रभावाखाली येतात. संपूर्ण ४० दिवसांमध्ये मंगळदेव आपले ३० दिवसांची चाल चालून जाणार असल्यामुळे त्यांच्या बाल, युवा, वृद्ध व मृत या चारही अवस्था आपल्याला अनुभवता येणार आहेत आणि म्हणूनच आपल्याला या ४० दिवसांमध्ये अतिशय काटेकोरपणे वागून मंगळदेवाकडून अशक्य त्या गोष्टी घडवता येणार आहेत.
लग्नी, म्हणजेच कालपुरुषाच्या मेष राशीमध्ये आलेला हा मंगळदेव तुमच्या रोगप्रतिकारशक्तीमध्ये वाढ करणार आहे. त्याचबरोबर तुमची अंतरिक ऊर्जा वाढेल. आत्मविश्वासामध्ये वाढ होईल. तुमच्यामधील नेतृत्वशक्ती, धडाडी आणि शौर्य यामध्ये वाढ होणार असून तुमच्या प्रयत्नांना यशही येणार आहे.
तुमची इतरांवर पडणारी छाप आणि जीवनाकडे पाहण्याचा तुमचा दृष्टिकोनही बदलेल. वैचारिक पातळीवर फक्त आणि फक्त धडाडीच तुमच्या नजरेसमोर राहील.
मंगळदेवाची चौथी दृष्टी ही चतुर्थस्थानावर आहे. त्यामुळे वाहन घेणे, जमीन घेणे, आईच्या संदर्भातील सुखप्राप्ती अशा गोष्टी घडतील. प्रॉपर्टी रिलेटेड आणि स्थावर मालमत्तेसंदर्भात लाभ मिळेल. खरेदी होईल. कोर्टकचेरीची कामे असतील, तर त्यामध्येही तुमचे प्रयत्न यशस्वी होणार आहेत.
आई आणि कुटुंबीय सदस्य यांच्यासाठी तुमच्याकडून खर्चही तितकाच होणार आहे. तरी प्रत्येकाचा स्वभाव आणि आवडीनिवडीचा विचार करून तो खर्च कारणी लावलात तर तुम्हालाही आनंद मिळवता येणार आहे.
या मंगळदेवाची सातवी दृष्टी सप्तमस्थानावर पडल्यामुळे सप्तमस्थानातील घडामोडी महत्त्वाच्या ठरणार आहेत. सप्तमस्थान हे वैवाहिक जीवनाचे आणि व्यवसायाचे स्थान असल्यामुळे, प्रथमतः विवाहाच्या बाबतीत तुम्हाला घाई करता येणार नाही.
विवाहेच्छुक वधू-वरांना विवाहासाठी लागणारा वेळ, ऍडजस्टमेंट आणि परस्पर समजूत या गोष्टींचा विचार करूनच निर्णय घ्यावा लागेल. त्याचबरोबर विवाहाचे कायदेशीर स्थान असल्यामुळे रजिस्टर विवाह करावयाचा असल्यास काही अडचणी निर्माण होऊ शकतात.
राहूची सातवी दृष्टी पंचमस्थानावर असल्यामुळे प्रेमविवाह किंवा रजिस्टर विवाह घाईने केल्यास तो यशस्वी होईल का, याचाही विचार करावा लागणार आहे.
त्याचबरोबर नोकरीतील बॉस, अधिकारी किंवा वरिष्ठ व्यक्तींकडून कोणता त्रास होऊ शकतो, याचा आधीच विचार करून ठेवलेला बरा. म्हणजे आपल्या हातून होणारी चूक आपल्याला महागात पडणार नाही.
दुकानदार, मालक किंवा व्यावसायिकांनी आपल्या हाताखालील सेवकांशी अतिशय प्रेमाने वागावे लागेल. कारण हे स्थान व्यवसायाचे असल्यामुळे मंगळ महाराज व्यवसायामध्ये घडामोडी करतील आणि त्या घडामोडी त्रासदायक ठरण्याची शक्यता आहे.
आर्थिक उलाढाली शांतपणे आणि विचारपूर्वक कराव्यात. ओव्हरड्राफ्ट घेणे, कर्ज काढणे, भागीदारी वाढवणे किंवा दुसऱ्याच्या व्यापारामध्ये भागीदार असाल, तर त्या भागीदारीबाबत विचार करणे आवश्यक राहणार आहे.
पती-पत्नीमधील प्रेमाला काही प्रमाणात ओहोटी लागण्याची शक्यता आहे. मतभेद, वादविवाद किंवा जुने वाद उकरून काढून भांडणे करण्याचा प्रयत्न करू नये.
घर भाड्याने दिलेले असेल, तर त्याबाबतीतही जागरूक राहणे महत्त्वाचे ठरेल. स्थावर मालमत्ता, जमीन-जुमला, वडिलोपार्जित मालमत्ता आणि सुखसोयीची साधने, उपकरणे किंवा घरातील वस्तूंमध्ये काही प्रमाणात बिघाड होऊ शकतो. त्यामुळे दुरुस्तीच्या खर्चासाठी मानसिक तयारी ठेवावी.
बागायती शेती आणि शेती उत्पादनांबाबत काळजी घेणे महत्त्वाचे ठरणार आहे.
आता आपण अष्टमस्थानावर मंगळदेवाची दृष्टी पडल्यानंतर निर्माण होणाऱ्या परिस्थितीचा विचार करूया.
मंगळदेवाची आठवी दृष्टी अष्टमभावावर पडत आहे. अष्टमस्थानाला मृत्यूस्थान, नुकसानकारक स्थान किंवा दुःखद घटनांचे स्थान असे म्हटले जाते. पण त्याचबरोबर या स्थानामुळे ‘इझी मनी’ देखील तयार होतो.
हा इझी मनी कशामुळे तयार होतो, याचा विचार करूया.
कमिशन, दलाली, सासुरवाडीकडून मिळणारे पैसे, कमी कामातून मिळणारे जास्त पैसे, वारसाहक्काने मिळणारे धन, अचानक द्रव्यप्राप्ती, पूर्वजांचे धन, कर्ज देणे-घेणे, ग्रॅच्युइटी, भविष्य निर्वाह निधी, बोनस, मृत्युपत्राद्वारे मिळणारे लाभ, दत्तक गेल्याने मिळणारे लाभ, दान, शिष्यवृत्ती किंवा विम्याची रक्कम अशा प्रकारे आर्थिक लाभ होण्याची शक्यता आहे.
आता आपण मंगळाच्या अष्टमस्थानातील आजारपण आणि मृत्यूस्थान या दृष्टिकोनातून विचार करूया.
मंगळाची सकारात्मकता मिळवण्यासाठी प्रथम क्रोध दूर करणे महत्त्वाचे ठरेल. रागामुळे आजकाल अनेक रोग निर्माण होतात. ब्लडप्रेशर वाढणे, चक्कर येणे, एखादी गोष्ट मनासारखी न झाल्यामुळे डिप्रेशन येणे, अपयशामुळे मानसिक त्रास होणे अशा गोष्टी टाळणे आवश्यक आहे.
म्हणूनच अष्टमस्थानातील दोष आणि वाईट गोष्टी टाळण्यासाठी आपल्या मानसिकतेमध्ये बदल करणे महत्त्वाचे ठरणार आहे.
अशा प्रकारे आपण जागरूक राहून या ४० दिवसांतील मंगळाच्या भ्रमणाचा लाभ घ्यायचा ठरवला, तर खचितच आपल्याला लाभ मिळेल. आपल्या कार्यामध्ये आत्मविश्वास वाढेल. उत्साह वाढेल आणि कार्य यशस्वी करण्यासाठी मंगळदेव नक्कीच आपल्या पाठीशी उभे राहतील.
आता त्यासाठी कोणती उपासना करावी, मानसिक बळ वाढण्यासाठी आणि मंगळदेव प्रसन्न होण्यासाठी कोणती साधना करावी, याचा विचार करूया.
मंगळदेवाचे अधिदेवता भगवान श्रीगणेश आहेत. म्हणूनच श्रीगणेशाचे स्तवन करणे, गणपती अथर्वशीर्षाचे वाचन करणे आणि श्रीगणपतीची उपासना करणे अत्यंत लाभदायक ठरेल.
सहज नामस्मरणासाठी पुढील मंत्राचा जप करावा —
“ॐ गं गणपतये नमः।”
या मंत्राचा दिवसातून किमान १०८ वेळा एका जागी बसून जप करावा आणि मंगळदेवाला नमस्कार करावा.
जय मंगळदेव!
जय गणपती बाप्पा!
